చెన్నై: ఈరోజు (ఆదివారం) ప్రధాని నరేంద్ర మోదీ చెన్నైలో పర్యటించారు. ఈ పర్యటనలో భాగంగా తమిళనాడు ముఖ్యమంత్రి సి. జోసెఫ్ విజయ్‌తో కలిసి ఆయన చెన్నై మెట్రో రైల్ ఫేజ్-2 తొలి దశ ప్రాజెక్టును లాంఛనంగా ప్రారంభించారు. పూనంమల్లి నుంచి వడపళని (Poonamallee-Vadapalani) మధ్య నిర్మించిన ఈ మెట్రో మార్గాన్ని ప్రారంభించిన అనంతరం, ఇరువురు నేతలు మెట్రో రైలులో కలిసి ప్రయాణించి విశేషాలు తెలుసుకున్నారు.
అటు తర్వాత చెన్నైలోని కేంద్రీయ విద్యాలయ గ్రౌండ్‌లో జరిగిన బహిరంగ సభలో ప్రధాని మోదీ రూ. 13,000 కోట్లకు పైగా విలువైన పలు భారీ అభివృద్ధి ప్రాజెక్టులకు శంకుస్థాపనలు మరియు ప్రారంభోత్సవాలు చేశారు. మెట్రో రైల్, హైవేలు, రైల్వేలు, పోర్టులు, పెట్రోలియం మరియు విద్యారంగాలకు సంబంధించిన ఈ ప్రాజెక్టులు రాష్ట్ర మౌలిక వసతుల అభివృద్ధికి ఎంతో తోడ్పడతాయని తెలిపారు.
ఈ సభలో తమిళనాడు ముఖ్యమంత్రి సి. జోసెఫ్ విజయ్ మాట్లాడుతూ.. కేంద్ర, రాష్ట్ర ప్రభుత్వాలు కలిసి పనిచేస్తే ప్రజలకు అపారమైన ప్రయోజనాలు కలుగుతాయని అన్నారు. తమిళనాడులో అవినీతి రహిత ప్రభుత్వాన్ని అందించడమే తమ లక్ష్యమని ఆయన స్పష్టం చేశారు. ఈ సభలో టీవీకే (TVK) శ్రేణులు పెద్దఎత్తున నినాదాలు చేస్తూ, తమ పార్టీ అధినేత విజయ్‌కు అనుకూలంగా ప్లకార్డులు ప్రదర్శించడం ప్రత్యేక ఆకర్షణగా నిలిచింది.
మెట్రో ప్రారంభోత్సవం అనంతరం ప్రధాని మోదీ ఐఐటీ మద్రాస్ (IIT Madras) ప్రాంగణానికి చేరుకున్నారు. అక్కడ జలకంఠేశ్వర ఆలయంలో ప్రత్యేక పూజలు నిర్వహించారు. అనంతరం ప్రముఖ ‘సుధా గోపాలకృష్ణన్ బ్రెయిన్ సెంటర్’ (SGBC)ను సందర్శించి, అక్కడ సాంకేతికత ఆధారంగా జరుగుతున్న వైద్య పరిశోధనలను పరిశీలించారు.
WATCH LIVE: PM Narendra Modi holds Roadshow in Chennai | Tamil Nadu | CM Vijay https://t.co/mqxwCBR3do
— ANI (@ANI) October 11, 2026
