హనుమజ్జయంతి 2026: శ్రీరాముని పరమ భక్తుడు, మహాబలశీలి అయిన ఆంజనేయ స్వామి పుట్టినరోజునే మనం ‘హనుమజ్జయంతి’ (లేదా హనుమాన్ జన్మోత్సవ్) గా జరుపుకుంటాం. స్వామివారి జీవితం భక్తి, అపారమైన శక్తి, ధర్మం మరియు చెడుపై మంచి సాధించిన విజయానికి ప్రతీక. ఈ పవిత్రమైన రోజున స్వామివారిని భక్తిశ్రద్ధలతో పూజిస్తే అఖండ ఐశ్వర్యం, ధైర్యం, జ్ఞానం సిద్ధిస్తాయని, జీవితంలోని సవాళ్లు దూరమవుతాయని భక్తుల ప్రగాఢ విశ్వాసం.
హనుమజ్జయంతి 2026: సరైన తేదీ, శుభ సమయం
హనుమజ్జయంతి తేదీ విషయంలో ప్రతి ఏడాదీ భక్తుల్లో కొంత గందరగోళం నెలకొంటుంది. కొందరు చైత్ర మాసంలో శ్రీరామ నవమి తర్వాత జరుపుకుంటే, తెలుగు రాష్ట్రాల్లోని సంప్రదాయం ప్రకారం వైశాఖ బహుళ దశమి నాడు అసలైన హనుమజ్జయంతిని ఆచరిస్తారు. హనుమంతుని జీవిత విశేషాలను తెలిపే పరాశర సంహితలోని మంగళాష్టక శ్లోకం ప్రకారం:
“వైశాఖే మాసి కృష్ణాయాం దశమ్యం మందవాసరే..
పూర్వాభాద్ర ప్రభూతాయ ఆంజనేయాయ మంగళమ్”
అంటే.. వైశాఖ మాసం, బహుళ పక్షం, దశమి తిథి నాడు పూర్వాభాద్ర నక్షత్రంలో స్వామివారు జన్మించారు.
2026 ముహూర్తం వివరాలు:
- దశమి తిథి ప్రారంభం: మే 11, సోమవారం ఉదయం 10:17 నిమిషాలకు.
- దశమి తిథి ముగింపు: మే 12, మంగళవారం ఉదయం 9:54 నిమిషాలకు.
మే 11న పూర్వాభాద్ర నక్షత్రం లేదు. మే 12న సూర్యోదయ సమయానికి దశమి తిథి ఉండటంతో పాటు స్వామివారి జన్మ నక్షత్రమైన పూర్వాభాద్ర నక్షత్రం కూడా ఉంది. కాబట్టి తిథి, నక్షత్ర సమన్వయం ఆధారంగా మే 12, మంగళవారం రోజునే హనుమజ్జయంతి జరుపుకోవడం అత్యంత శ్రేయస్కరం అని పండితులు మరియు పంచాంగకర్తలు స్పష్టం చేస్తున్నారు.
(గమనిక: చైత్ర మాసంలో నిర్వహించే ఉత్సవాలను కొందరు “హనుమత్ విజయోత్సవం”గా పరిగణిస్తారు. ఇది ఆయన వీరత్వానికి, రామభక్తికి ప్రతీకగా చేసే శోభాయాత్రల సమయం).
పూజా విధానం (ఎలా జరుపుకోవాలి?)
- సూర్యోదయానికి ముందే నిద్రలేచి తలారా స్నానం చేయాలి. స్వామికి ఇష్టమైన సింధూరం రంగు వస్త్రాలను ధరించడం శుభప్రదం.
- పూజామందిరంలో ఆంజనేయుని చిత్రపటాన్ని రకరకాల పూలతో అలంకరించి, స్వామివారికి ఎర్రటి సింధూరం బొట్టు పెట్టాలి. నువ్వుల నూనెతో దీపారాధన చేయాలి.
- హనుమాన్ అష్టోత్తర శతనామావళి, హనుమాన్ చాలీసా, ఆంజనేయ దండకం, మరియు రామాయణంలోని సుందరకాండ పారాయణ చేయడం వల్ల జీవితంలోని అడ్డంకులు తొలగిపోతాయి.
- ఇంట్లో పూజ పూర్తయ్యాక హనుమాన్ ఆలయాన్ని దర్శించుకోవాలి. స్వామికి తమలపాకులతో ఆకు పూజ చేయించడం వల్ల భయాలు దూరమవుతాయి. శత్రుభయం తొలగి అభీష్టసిద్ధి కలగాలంటే స్వామివారికి ‘వడమాల’ సమర్పించాలి.
నైవేద్యం
హనుమంతునికి ప్రసాదంగా వడపప్పు, పానకం, గారెలు మరియు బెల్లం అప్పాలు నైవేద్యంగా సమర్పించాలి. చివరలో మంగళాష్టకం పఠిస్తూ కర్పూర నీరాజనం (హారతి) ఇవ్వాలి.
పాటించవలసిన ముఖ్యమైన నియమాలు (వ్రత విధానం)
స్వామివారి కృపను పొందడానికి ఈ రోజున భక్తులు కొన్ని నియమాలు ఆచరించాలి:
- సూర్యోదయం నుండి సాయంత్రం/సూర్యాస్తమయం వరకు ఉపవాసం ఉండాలి.
- ఈ పవిత్ర దినాన శారీరక, మానసిక శుద్ధితో బ్రహ్మచర్యం పాటించాలి. అలాగే రాత్రి వేళ నేల మీద (భూశయనం) నిద్రించాలి.
- సమాజ సేవ చేయడం స్వామికి ఎంతో ఇష్టం. కాబట్టి పేదలకు అన్నదానం, వస్త్రదానం వంటివి చేయడం మంచిది.
నియమ నిష్టలతో హనుమజ్జయంతి నాడు ఆంజనేయుడిని స్మరిస్తే విశేషమైన పుణ్యఫలంతో పాటు ప్రశాంతత మరియు విజయం మీ సొంతమవుతాయి.
జై శ్రీరామ్! శ్రీ రామభక్త హనుమాన్ కీ జై!
