నేపాల్‌లోని మధేష్ ప్రావిన్స్‌లో ఒక చిన్న టిక్ టాక్ వీడియో పెను దుమారాన్ని రేపింది. ఒక వర్గాన్ని లక్ష్యంగా చేసుకుని చేసిన మతపరమైన వ్యాఖ్యలు హింసాత్మక నిరసనలకు దారితీయడంతో, అధికారులు నేపాల్-భారత్ సరిహద్దు పట్టణమైన బీర్ గంజ్ (Birgunj) లో కఠిన కర్ఫ్యూ విధించారు. ఈ వివాదం ధనుషా జిల్లాలో మొదలై పర్సా జిల్లాకు పాకడంతో సాధారణ జనజీవనం పూర్తిగా స్తంభించిపోయింది.
వివాదానికి కారణమైన టిక్ టాక్ వీడియో
ఈ ఉద్రిక్తతలకు ప్రధాన కారణం ధనుషా జిల్లాలోని కమల మున్సిపాలిటీకి చెందిన ఇద్దరు యువకులు, హైదర్ అన్సారీ మరియు అమానత్ అన్సారీ ఒక టిక్ టాక్ వీడియోను అప్‌లోడ్ చేయడం. ఆ వీడియోలో ఇతర మతాల భావాలను దెబ్బతీసేలా ఉన్న వ్యాఖ్యలు వైరల్ కావడంతో స్థానికులు తీవ్ర ఆగ్రహం వ్యక్తం చేశారు. మత సామరస్యానికి విఘాతం కలిగిస్తున్నారనే ఆరోపణలతో స్థానికులు ఆ ఇద్దరు యువకులను పట్టుకుని పోలీసులకు అప్పగించారు.
వీడియో వివాదం రాజుకున్న కొద్దిసేపటికే కమల మున్సిపాలిటీలోని వార్డు నెం. 6లో ఉన్న ఒక మసీదుపై కొందరు దుండగులు దాడి చేసి ధ్వంసం చేశారు. దీనికి నిరసనగా ముస్లిం వర్గాల వారు బీర్ గంజ్ మరియు జనక్‌పూర్ ప్రాంతాల్లో భారీ ప్రదర్శనలు చేపట్టారు. నిరసనకారులు రోడ్లపై టైర్లు తగులబెట్టి, నినాదాలు చేస్తూ పోలీసులపైకి రాళ్లు రువ్వారు. పరిస్థితి అదుపు తప్పడంతో పోలీసులు బాష్పవాయువు (Tear Gas) ప్రయోగించాల్సి వచ్చింది. ఈ ఘర్షణల్లో కనీసం ఏడుగురు పోలీసులు గాయపడినట్లు అధికారులు ధృవీకరించారు.
బీర్ గంజ్‌లో కఠిన కర్ఫ్యూ.. ‘షూట్ ఎట్ సైట్’ ఆదేశాలు
పరిస్థితి తీవ్రతను గమనించిన పర్సా జిల్లా పరిపాలనా యంత్రాంగం (DAO) జనవరి 5, సోమవారం సాయంత్రం 6 గంటల నుండి కర్ఫ్యూ విధించింది. పరిస్థితి ఇంకా ఉద్రిక్తంగానే ఉండటంతో, మంగళవారం (జనవరి 6, 2026) మధ్యాహ్నం 1 గంట వరకు ఈ కర్ఫ్యూను పొడిగించారు. బస్ పార్క్, నాగ్వా, ఇనార్వా, సిర్సియా నది, గందక్ చౌక్ మరియు శంకరాచార్య గేట్ లోపల ఎటువంటి సమావేశాలు, ర్యాలీలు నిర్వహించకూడదని ఆదేశించారు. కర్ఫ్యూ నిబంధనలు ఉల్లంఘించి రోడ్లపైకి వచ్చేవారిని కనిపిస్తే కాల్చివేసే (Shoot on sight) అధికారాలను భద్రతా దళాలకు ఇచ్చారు.
