రష్యా-ఉక్రెయిన్ యుద్ధం మరోసారి అత్యంత ఉద్రిక్త స్థాయికి చేరుకుంది. రష్యా అధ్యక్షుడు వ్లాదిమిర్ పుతిన్ నివాసాన్ని లక్ష్యంగా చేసుకుని ఉక్రెయిన్ భారీ స్థాయిలో డ్రోన్ దాడులకు పాల్పడిందని క్రెమ్లిన్ సంచలన ఆరోపణలు చేసింది.
రష్యా విదేశాంగ మంత్రి సెర్గీ లావ్రోవ్ వెల్లడించిన వివరాల ప్రకారం.. డిసెంబర్ 28-29 మధ్య రాత్రి ఉక్రెయిన్ దళాలు రష్యాలోని నోవ్గోరోడ్ (Novgorod) ప్రాంతంలో ఉన్న పుతిన్ అధికారిక నివాసాన్ని లక్ష్యంగా చేసుకున్నాయి. ఏకంగా 91 దీర్ఘశ్రేణి డ్రోన్లతో (Long-range Drones) ఈ దాడికి ప్రయత్నించినట్లు రష్యా ప్రకటించింది. అయితే, రష్యా వైమానిక రక్షణ వ్యవస్థలు అప్రమత్తమై ఆ డ్రోన్లన్నింటినీ కూల్చివేశాయని, ఈ ఘటనలో ఎవరికీ ఎటువంటి గాయాలు కాలేదని, ఆస్తి నష్టం కూడా జరగలేదని రష్యా స్పష్టం చేసింది.
ఈ దాడిని రష్యా ప్రభుత్వం తీవ్రంగా పరిగణిస్తోంది. ఇది ఉక్రెయిన్ సాగిస్తున్న “స్టేట్ టెర్రరిజం” (రాజ్య ఉగ్రవాదం) అని సెర్గీ లావ్రోవ్ అభివర్ణించారు. రష్యా-అమెరికా మధ్య శాంతి చర్చలు జరుగుతున్న తరుణంలో ఇటువంటి దాడులు చేయడం శాంతి ప్రక్రియను దెబ్బతీయడమేనని ఆయన మండిపడ్డారు.
“ఇటువంటి బాధ్యతారహితమైన చర్యలకు రష్యా తగిన సమాధానం ఇస్తుంది. ప్రతీకార దాడుల కోసం మేము ఇప్పటికే లక్ష్యాలను గుర్తించాం. సరైన సమయంలో ఉక్రెయిన్కు బుద్ధి చెబుతాం,” అని లావ్రోవ్ హెచ్చరించారు.
రష్యా చేస్తున్న ఈ ఆరోపణలను ఉక్రెయిన్ అధ్యక్షుడు వొలోదిమిర్ జెలెన్స్కీ ఖండించారు. పుతిన్ నివాసంపై దాడి జరిగిందన్న వార్తల్లో ఏమాత్రం వాస్తవం లేదని, ఇది రష్యా సృష్టించిన కట్టుకథ అని ఆయన కొట్టిపారేశారు. ఉక్రెయిన్ రాజధాని కీవ్లోని ప్రభుత్వ భవనాలపై దాడులు చేయడానికి రష్యా ఒక సాకును వెతుక్కుంటోందని, అందుకే ఇటువంటి తప్పుడు ప్రచారాలు చేస్తోందని ఆయన ఆరోపించారు.
శాంతి చర్చలను పక్కదారి పట్టించడానికి రష్యా ఇటువంటి ‘డ్రామాలు’ ఆడుతోందని ఉక్రెయిన్ విదేశాంగ శాఖ పేర్కొంది. గడిచిన 24 గంటల్లో ఈ దాడికి సంబంధించిన ఎటువంటి ఆధారాలను (వీడియోలు లేదా ఫోటోలు) రష్యా చూపించలేదని ఉక్రెయిన్ గుర్తు చేసింది.
ఈ పరిణామంపై భారత ప్రధానమంత్రి నరేంద్ర మోదీ ఆందోళన వ్యక్తం చేశారు. శాంతి స్థాపన కోసం దౌత్యపరమైన చర్చలే సరైన మార్గమని ఆయన సూచించారు. రష్యా అధ్యక్షుడు పుతిన్ నివాసంపై దాడి వార్తలు తనను కలవరపెట్టాయని, ఇరు దేశాలు సంయమనం పాటించాలని ఆయన ఎక్స్ (X) వేదికగా కోరారు.
మరోవైపు, అమెరికా అధ్యక్షుడు డొనాల్డ్ ట్రంప్ కూడా ఈ ఘటనపై స్పందించారు. పుతిన్ స్వయంగా తనకు ఫోన్ చేసి ఈ విషయం చెప్పారని, అధ్యక్షుడి నివాసాన్ని లక్ష్యంగా చేసుకోవడం సరైన పద్ధతి కాదని ఆయన వ్యాఖ్యానించారు. శాంతి చర్చల సమయంలో ఇటువంటి ఉద్రిక్తతలు మంచిది కాదని ట్రంప్ పేర్కొన్నారు.
Deeply concerned by reports of the targeting of the residence of the President of the Russian Federation. Ongoing diplomatic efforts offer the most viable path toward ending hostilities and achieving peace. We urge all concerned to remain focused on these efforts and to avoid any…
— Narendra Modi (@narendramodi) December 30, 2025
