భారత క్రికెట్ చరిత్రలో ‘సిక్సర్ల కింగ్’గా పేరుగాంచిన యువరాజ్ సింగ్, తాను అంతర్జాతీయ క్రికెట్ నుండి ఎందుకు తప్పుకోవాల్సి వచ్చిందో తాజాగా వెల్లడించారు. టెన్నిస్ స్టార్ సానియా మీర్జాతో జరిగిన ఒక ప్రత్యేక ఇంటర్వ్యూలో యువీ తన మనసులోని మాటను పంచుకుంటూ, రిటైర్మెంట్ వెనుక ఉన్న బాధాకరమైన విషయాలను బయటపెట్టారు.
టీమ్ ఇండియా మాజీ స్టార్ ఆల్ రౌండర్ యువరాజ్ సింగ్, టెన్నిస్ దిగ్గజం సానియా మీర్జా నిర్వహిస్తున్న ‘సర్వింగ్ ఇట్ అప్ విత్ సానియా’ (Serving It Up with Sania) యూట్యూబ్ షోలో పాల్గొని తన కెరీర్, రిటైర్మెంట్ మరియు ప్రస్తుత క్రికెటర్ల గురించి పలు ఆసక్తికర వ్యాఖ్యలు చేశారు.
గౌరవం లేని చోట ఉండలేకపోయాను..
యువరాజ్ సింగ్ తన రిటైర్మెంట్ నిర్ణయంపై స్పందిస్తూ, అది కేవలం ఆటతీరుకు సంబంధించింది మాత్రమే కాదని, బోర్డు (BCCI) మరియు మేనేజ్మెంట్ నుండి తనకు లభించిన ప్రవర్తనపై కూడా ఆధారపడి ఉందని పేర్కొన్నారు. కెరీర్ చివరి దశలో ఉన్నప్పుడు తనకు మేనేజ్మెంట్ నుండి సరైన మద్దతు లభించలేదని యువీ ఆవేదన వ్యక్తం చేశారు. “నాకు ఆటపై ఉన్న గౌరవం కంటే, నాకు లభించాల్సిన గౌరవం ముఖ్యం. జట్టులో తగినంత గౌరవం లభించనప్పుడు, ఇక ఆటకు స్వస్తి పలకడమే మంచిదని నిర్ణయించుకున్నాను” అని ఆయన అన్నారు.
ధోనీ ఏం చెప్పాడంటే..?
తన రిటైర్మెంట్ సమయం నాటి పరిస్థితులపై యువీ స్పందిస్తూ మాజీ కెప్టెన్ ఎంఎస్ ధోనీ ప్రస్తావన తెచ్చారు. సెలెక్టర్లు లేదా మేనేజ్మెంట్ తనను భవిష్యత్తు ప్రణాళికల్లో భాగంగా చూడటం లేదని ధోనీ తనకు స్పష్టంగా చెప్పినట్లు వెల్లడించారు. ఆటలో మునుపటి లాంటి గౌరవం దక్కడం లేదని, ఇక తాను సాధించడానికి ఏమీ లేదని అనిపించినప్పుడు భారంగా కొనసాగడం కంటే తప్పుకోవడమే మంచిదని భావించినట్లు చెప్పారు. రిటైర్మెంట్ తర్వాతే తాను మళ్ళీ సాధారణ మనిషిగా, ప్రశాంతంగా మారానని యువీ భావోద్వేగంగా చెప్పుకొచ్చారు.
అభిషేక్ శర్మ బ్యాటింగ్ నా లాగే ఉంటుంది!
ప్రస్తుత టీమ్ ఇండియా యువ సంచలనం అభిషేక్ శర్మ గురించి యువీ ప్రశంసలు కురిపించారు. అభిషేక్ ఎదుగుదల వెనుక తన కృషిని వివరిస్తూ: అభిషేక్ ఈ స్థాయిలో ఆడుతున్నాడంటే అది కేవలం ఒకటి రెండు నెలల కృషి కాదు, 4 ఏళ్ల 3 నెలల కఠిన శ్రమ అని యువీ తెలిపారు. “నువ్వు ఐపీఎల్, రంజీల కోసం కాదు.. దేశం కోసం ఆడాలి” అని తాను అతడికి లక్ష్యాన్ని నిర్దేశించినట్లు చెప్పారు.అభిషేక్ బ్యాటింగ్ శైలి చూస్తుంటే తన పాత రోజులు గుర్తొస్తాయని, తనలాగే అతను కూడా విధ్వంసకరంగా ఆడతాడని కొనియాడారు.
క్యాన్సర్ తర్వాత కష్టకాలం
2011 ప్రపంచ కప్ హీరోగా నిలిచిన తర్వాత క్యాన్సర్తో పోరాడి తిరిగి వచ్చినా, 2014-2017 మధ్య కాలం తన కెరీర్లో అత్యంత క్లిష్టమైనదని యువీ గుర్తు చేసుకున్నారు. 2017లో ఇంగ్లాండ్పై చేసిన 150 పరుగులు తన కెరీర్లో అత్యుత్తమ ఇన్నింగ్స్ అని, కానీ ఆ ఫామ్ను కొనసాగించలేకపోవడం తనను బాధించిందని అన్నారు.
