మాఘ పౌర్ణమి విశిష్టత: ఈ రోజున నదీ స్నానం ఎందుకు చేయాలి? పురాణాలు ఏం చెబుతున్నాయి?

హిందూ క్యాలెండర్ ప్రకారం మాఘ మాసం అత్యంత పవిత్రమైనది. అందులోనూ మాఘ పౌర్ణమి (Magha Purnima) కు ఒక ప్రత్యేక స్థానం ఉంది. ఈ రోజున చేసే స్నాన, దాన జపాలకు వేల రెట్లు ఫలితం ఉంటుందని శాస్త్రాలు చెబుతున్నాయి. ఈరోజు  ఈ పర్వదినం సందర్భంగా దాని ప్రాముఖ్యత మరియు పాటించాల్సిన నియమాల గురించి ఈ ప్రత్యేక కథనం మీకోసం..

మాఘ పౌర్ణమి అంటే ఏమిటి?

చంద్రుడు మఖ నక్షత్రంతో కూడి ఉన్న రోజును మాఘ పౌర్ణమి అంటారు. ఈ రోజుతో మాఘ స్నాన వ్రతం ముగుస్తుంది. ఉత్తరాయణ పుణ్యకాలంలో వచ్చే ఈ పౌర్ణమి ఆధ్యాత్మికంగా ఎంతో శక్తివంతమైనది.

ఈ రోజు విశిష్టతలేంటి?

• పురాణాల ప్రకారం, మాఘ పౌర్ణమి నాడు దేవతలందరూ భూమిపైకి వచ్చి గంగా నదిలో స్నానం చేస్తారని నమ్మకం. అందుకే ఈ రోజున గంగా స్నానం చేస్తే సకల పాపాలు నశిస్తాయని భక్తులు భావిస్తారు.ఈ రోజున యమధర్మరాజును పూజించడం వల్ల అపమృత్యు దోషాలు తొలగిపోతాయని పండితులు చెబుతుంటారు. ఈ రోజు చేసే దానం అశ్వమేధ యాగం చేసినంత ఫలితాన్ని ఇస్తుంది. ముఖ్యంగా అన్నదానం, వస్త్ర దానం మరియు నువ్వుల దానానికి ప్రాధాన్యత ఉంది.

మాఘ పౌర్ణమి నాడు చేయవలసిన పనులు

సూర్యోదయానికి ముందే పవిత్ర నదులలో స్నానం చేయడం అత్యుత్తమం. నదులకు వెళ్లలేని వారు ఇంట్లోనే నీటిలో కొంచెం గంగాజలం కలుపుకుని స్నానం చేయవచ్చు. పౌర్ణమి రోజున సత్యనారాయణ స్వామి వ్రతం చేసుకోవడం వల్ల ఇంట్లో సుఖశాంతులు వెల్లివిరుస్తాయి. సాయంత్రం వేళ ఆవు నెయ్యితో దీపారాధన చేసి, లక్ష్మీదేవిని పూజించడం వల్ల ఐశ్వర్యం లభిస్తుంది. ఈ రోజున పితృ దేవతలకు తర్పణాలు వదలడం వల్ల వారి ఆశీస్సులు లభిస్తాయి.

ఆధ్యాత్మిక పరమార్థం

ఆధ్యాత్మికంగా చూస్తే, మాఘ మాసం మనిషిలోని అజ్ఞానాన్ని తొలగించి జ్ఞానోదయం వైపు నడిపిస్తుంది. శీతాకాలం ముగిసి వసంత రుతువు రాకకు ముందు వచ్చే ఈ పౌర్ణమి, ప్రకృతిలో వచ్చే మార్పులతో పాటు మనిషి ఆరోగ్యంపై కూడా సానుకూల ప్రభావం చూపుతుంది.

ఈ రోజున “ఓం నమో నారాయణాయ” అనే మంత్రాన్ని జపించడం వల్ల మానసిక ప్రశాంతత లభిస్తుంది.