భారతదేశానికి అమెరికా అధ్యక్షుడు డొనాల్డ్ ట్రంప్ మరోసారి గట్టి హెచ్చరికలు జారీ చేశారు. రష్యా నుంచి ముడి చమురు (Crude Oil) దిగుమతుల విషయంలో భారత్ తన వైఖరిని మార్చుకోకపోతే, ఆ దేశం నుంచి వచ్చే వస్తువులపై దిగుమతి సుంకాలను (Tariffs) మరింత పెంచుతామని ఆయన హెచ్చరించారు. జనవరి 5, 2026న ఎయిర్ ఫోర్స్ వన్లో విలేకరులతో మాట్లాడిన ట్రంప్, ఈ మేరకు కీలక వ్యాఖ్యలు చేశారు.
ఉక్రెయిన్తో యుద్ధం కొనసాగిస్తున్న రష్యాకు ఆర్థికంగా అండగా నిలుస్తున్న దేశాలను ట్రంప్ టార్గెట్ చేస్తున్నారు. ముఖ్యంగా రష్యా నుంచి భారీగా చమురు కొనుగోలు చేస్తున్న భారత్, చైనాలపై ఆయన గత కొంతకాలంగా ఒత్తిడి పెంచుతున్నారు. “రష్యా ఆయిల్ విషయంలో భారత్ మాకు సహకరించకపోతే, మేము వారిపై చాలా వేగంగా టారిఫ్లు పెంచగలము” అని ట్రంప్ స్పష్టం చేశారు. ఇప్పటికే భారత్పై అమెరికా విధించిన సుంకాలు ప్రపంచంలోనే అత్యధికంగా ఉన్నాయి.
ట్రంప్ తన ప్రసంగంలో భారత ప్రధానమంత్రి నరేంద్ర మోదీని ప్రశంసిస్తూనే, వాణిజ్య పరంగా తన అసంతృప్తిని వెళ్లగక్కారు. “ప్రధాని మోదీ చాలా మంచి వ్యక్తి. నేను ఈ విషయంలో సంతోషంగా లేనని ఆయనకు తెలుసు. నన్ను సంతోషపెట్టడం భారత్కు చాలా ముఖ్యం. వారు మాతో వాణిజ్యం చేస్తున్నారు, కాబట్టి మేము వారిపై సుంకాలను వెంటనే పెంచే అవకాశం ఉంది” అని ట్రంప్ వ్యాఖ్యానించారు.
గత ఏడాది (2025) ఆగస్టులో భారత ఉత్పత్తులపై అమెరికా సుంకాలను 50 శాతానికి పెంచింది. ఇందులో 25 శాతం సుంకం కేవలం రష్యా నుంచి ఆయిల్ కొనుగోలు చేస్తున్నందుకు ‘శిక్ష’గా విధించినట్లు ట్రంప్ పేర్కొన్నారు.
అమెరికా విధిస్తున్న ఈ భారీ సుంకాల వల్ల భారత ఎగుమతులు భారీగా దెబ్బతింటున్నాయి. తాజా నివేదికల ప్రకారం, 2025 మే నుండి సెప్టెంబర్ మధ్య కాలంలో అమెరికాకు భారత ఎగుమతులు 37.5 శాతం తగ్గాయి. గతంలో $8.8 బిలియన్లుగా ఉన్న ఎగుమతులు $5.5 బిలియన్లకు పడిపోయాయి. ఐటీ, టెక్స్టైల్స్, ఫార్మా రంగాలు ఈ సుంకాల దెబ్బకు విలవిలలాడుతున్నాయి.
లిండ్సే గ్రాహం వంటి అమెరికన్ సెనేటర్లు కూడా భారత్ రష్యా చమురు దిగుమతులను తగ్గించిందని, అయితే పూర్తిస్థాయిలో సహకరించాలని కోరుతున్నారు. మరోవైపు, 50 శాతం టారిఫ్లను తగ్గించాలని భారత రాయబారి అమెరికాను కోరినట్లు తెలుస్తోంది.
