గ్రీన్ ల్యాండ్ కొనుగోలు వ్యవహారంలో అమెరికా అధ్యక్షుడు డొనాల్డ్ ట్రంప్ చేసిన టారిఫ్ బెదిరింపులపై ఫ్రాన్స్ ప్రభుత్వం ఘాటుగా స్పందించింది. వాణిజ్య యుద్ధం అంటూ జరిగితే అందులో నష్టపోయేది కేవలం యూరప్ మాత్రమే కాదని, అమెరికా కూడా భారీ మూల్యం చెల్లించుకోక తప్పదని ఫ్రాన్స్ వ్యవసాయ శాఖ మంత్రి ఆనీ జెనెవార్డ్ (Annie Genevard) హెచ్చరించారు. ఆదివారం యూరప్ 1 మరియు సిఎన్యూస్ ఛానెళ్లతో మాట్లాడుతూ ఆమె ఈ సంచలన వ్యాఖ్యలు చేశారు.
ట్రంప్ తన గ్రీన్ ల్యాండ్ కల నెరవేర్చుకోవడానికి మిత్రదేశాలపై పన్నుల అస్త్రం ప్రయోగించడం విడ్డూరంగా ఉందని మంత్రి జెనెవార్డ్ పేర్కొన్నారు. “ఈ టారిఫ్ ల పెంపుదల వల్ల ట్రంప్ కూడా చాలా కోల్పోవాల్సి వస్తుంది. ముఖ్యంగా ఆయన సొంత దేశంలోని రైతులు మరియు పారిశ్రామికవేత్తలే దీనివల్ల తీవ్రంగా నష్టపోతారు,” అని ఆమె విశ్లేషించారు. ఒకవేళ వాణిజ్య యుద్ధమే జరిగితే అది రెండు వైపులా ప్రాణాంతకంగా మారుతుందని, అయితే అమెరికా ఆర్థిక వ్యవస్థపై పడే ప్రభావం తక్కువేమీ కాదని ఆమె స్పష్టం చేశారు.
ఫ్రాన్స్ అధ్యక్షుడు ఇమ్మాన్యుయేల్ మాక్రాన్ కూడా ట్రంప్ తీరుపై తీవ్ర ఆగ్రహం వ్యక్తం చేశారు. గ్రీన్ ల్యాండ్ విషయంలో యూరప్ దేశాలను భయపెట్టి దారికి తెచ్చుకోవాలనుకోవడం “ఆమోదయోగ్యం కాదు” అని ఆయన తేల్చిచెప్పారు. “ఉక్రెయిన్ విషయంలోనైనా, గ్రీన్ ల్యాండ్ విషయంలోనైనా సరే.. బెదిరింపులకు, ఒత్తిళ్లకు తలొగ్గే ప్రసక్తే లేదు,” అని మాక్రాన్ సోషల్ మీడియా వేదికగా స్పష్టం చేశారు. ఐరోపా సార్వభౌమత్వాన్ని కాపాడుకోవడంలో తాము వెనక్కి తగ్గేది లేదని ఆయన ఉద్ఘాటించారు.
గ్రీన్ ల్యాండ్ కొనుగోలు ప్రతిపాదనను వ్యతిరేకిస్తున్న 8 దేశాలపై (డెన్మార్క్, నార్వే, స్వీడన్, ఫ్రాన్స్, జర్మనీ, బ్రిటన్, నెదర్లాండ్స్, ఫిన్లాండ్) ట్రంప్ వాణిజ్య ఆంక్షలు ప్రకటించిన విషయం తెలిసిందే. ఈ దేశాల నుండి అమెరికాకు వచ్చే వస్తువులపై 10% టారిఫ్ విధిస్తామని ప్రకటించారు. జూన్ 1 నాటికి కూడా గ్రీన్ ల్యాండ్ డీల్ కుదరకపోతే, ఈ పన్నును 25%కి పెంచుతామని అల్టిమేటం జారీ చేశారు.
ట్రంప్ ప్రకటనతో అప్రమత్తమైన యూరోపియన్ యూనియన్ బ్రస్సెల్స్లో అత్యవసర సమావేశానికి పిలుపునిచ్చింది. “అమెరికా చర్యలకు ధీటుగా బదులిచ్చే సత్తా యూరప్కు ఉంది. మా వాణిజ్య శక్తిని తక్కువ అంచనా వేయవద్దు,” అని మంత్రి జెనెవార్డ్ అమెరికాను హెచ్చరించారు. మరోవైపు, ఈయూ చీఫ్ ఉర్సులా వాన్ డెర్ లేయర్ కూడా స్పందిస్తూ.. టారిఫ్ లు విధిస్తే అట్లాంటిక్ సంబంధాలు దెబ్బతింటాయని, అది ప్రమాదకరమైన పరిస్థితులకు దారితీస్తుందని ఆందోళన వ్యక్తం చేశారు. బ్రిటన్ ప్రధాని కీర్ స్టార్మర్ కూడా ట్రంప్ నిర్ణయం “పూర్తిగా తప్పు” అని ఖండించారు.
