ఇస్లామాబాద్/కాబూల్: గత దశాబ్ద కాలంగా అఫ్గానిస్తాన్ మరియు పాకిస్తాన్ దేశాల మధ్య కొనసాగుతున్న వాణిజ్య బంధం ఇప్పుడు అత్యంత క్లిష్ట దశకు చేరుకుంది. తాజా అధికారిక గణాంకాల ప్రకారం, ఈ రెండు దేశాల మధ్య ద్వైపాక్షిక వాణిజ్యం గతంలో ఎన్నడూ లేని విధంగా 50 శాతానికి పైగా క్షీణించింది. ఒకప్పుడు బిలియన్ డాలర్ల వ్యాపారంతో కళకళలాడిన సరిహద్దులు, ఇప్పుడు ఉద్రిక్తతలు మరియు ఆంక్షల మధ్య వెలవెలబోతున్నాయి.
పాకిస్తానీ మీడియా మరియు అధికారిక వర్గాల సమాచారం ప్రకారం, 2024-25 ఆర్థిక సంవత్సరం మొదటి ఆరు నెలల్లో 1.26 బిలియన్ డాలర్లుగా ఉన్న వాణిజ్య పరిమాణం, 2025-26 అదే కాలానికి కేవలం 594 మిలియన్ డాలర్లకు పడిపోయింది. అంటే దాదాపు 53 శాతం మేర వ్యాపారం తగ్గిపోయింది. ముఖ్యంగా పాకిస్తాన్ నుండి అఫ్గానిస్తాన్కు జరిగే ఎగుమతుల్లో భారీ కోత పడటంతో పాక్ ఆర్థిక వ్యవస్థకు నెలకు సుమారు 177 మిలియన్ డాలర్ల (సుమారు రూ. 1,500 కోట్లు) నష్టం వాటిల్లుతోంది.
2025 అక్టోబర్లో పాక్ దళాలు మరియు తాలిబన్ల మధ్య జరిగిన సరిహద్దు ఘర్షణల అనంతరం, పాకిస్తాన్ సుమారు ఎనిమిది కీలక సరిహద్దు పాయింట్లను మూసివేసింది. ముఖ్యంగా తొర్ఖామ్ వంటి ప్రధాన వాణిజ్య మార్గాలు మూతపడటంతో వేల సంఖ్యలో సరుకు రవాణా కంటైనర్లు సరిహద్దుల వద్దే నిలిచిపోయాయి.
మరోవైపు,ఆఫ్ఘన్ భూభాగం నుండి పాకిస్తాన్పై తెహ్రీక్-ఇ-తాలిబన్ పాకిస్తాన్ (TTP) ఉగ్రవాదులు దాడులు చేస్తున్నారని ఇస్లామాబాద్ ఆరోపిస్తోంది. అఫ్గాన్ పాలకులు దీనిని అడ్డుకుంటామని లిఖితపూర్వక హామీ ఇచ్చే వరకు సరిహద్దులు తెరిచే ప్రసక్తే లేదని పాక్ విదేశాంగ శాఖ స్పష్టం చేసింది.
