నూతన సంవత్సర వేడుకల ముంగిట ఢిల్లీ పోలీసులు అత్యంత వ్యూహాత్మకంగా వ్యవహరిస్తున్నారు. శనివారం (డిసెంబర్ 27, 2025) రాత్రంతా సౌత్ ఈస్ట్ ఢిల్లీ పరిధిలో పోలీసులు ‘ఆపరేషన్ ఆఘాట్’ (Operation Aaghat) పేరుతో విరుచుకుపడ్డారు. ఈ ఆపరేషన్లో భాగంగా గడిచిన 24 గంటల్లో భారీ సంఖ్యలో నేరగాళ్లను అదుపులోకి తీసుకోవడం విశేషం.
సౌత్ ఈస్ట్ ఢిల్లీ జిల్లాలోని సమస్యాత్మక ప్రాంతాల్లో పోలీసులు ఏకకాలంలో దాడులు నిర్వహించారు. ఈ మెగా ఆపరేషన్ లో సుమారు 1300 మందిని క్షుణ్ణంగా తనిఖీ చేయగా, వివిధ నేరాలతో సంబంధం ఉన్న 285 మందిని పోలీసులు అధికారికంగా అరెస్ట్ చేశారు. వీరిలో మద్యం అక్రమ రవాణా, డ్రగ్స్ విక్రయం, జూదం ఆడే వారు మరియు పాత నేరస్థులు ఉన్నారు.
పోలీసులు చేపట్టిన ఈ మెరుపు దాడుల్లో భారీగా అక్రమ ఆయుధాలు బయటపడ్డాయి. 21 నాటు పిస్టల్స్, సుమారు 27 కత్తులను మరియు 20 సజీవ తూటాలను స్వాధీనం చేసుకున్నారు. 12,258 క్వార్టర్ల అక్రమ మద్యాన్ని, సుమారు 6.01 కిలోల గంజాయిని పట్టుకున్నారు. అలాగే 231 ద్విచక్ర వాహనాలు, ఒక ఫోర్ వీలర్ను పోలీసులు అదుపులోకి తీసుకున్నారు.
ఈ ఆపరేషన్ లో లభించిన మరో అతిపెద్ద విజయం అంతరాష్ట్ర వాహన చోర ముఠా గుట్టురట్టు కావడం. ‘ఆపరేషన్ ఆఘాట్’ లో భాగంగా షాదరా జిల్లాలో 50 ఏళ్ల కమర్యాబ్ అనే వ్యక్తిని ఏఏటీఎస్ (AATS) బృందం అరెస్ట్ చేసింది. ఇతను దేశంలోని వివిధ రాష్ట్రాల్లో వాహనాలను దొంగలించి విక్రయించే ముఠాలో కీలక సభ్యుడని పోలీసులు వెల్లడించారు.
ఢిల్లీలో నూతన సంవత్సర వేడుకలు జరుపుకోవడానికి వేలాది మంది ప్రజలు రోడ్ల మీదకు వచ్చే అవకాశం ఉంది. ఈ క్రమంలో ఎటువంటి అవాంఛనీయ సంఘటనలు జరగకుండా ఉండాలని, ముఖ్యంగా మహిళల భద్రత కోసం పోలీసులు ఈ ముందస్తు చర్యలు చేపట్టారు. వీధి నేరాలను (Street Crimes) అరికట్టడమే లక్ష్యంగా ఈ ఆపరేషన్ కొనసాగుతోందని డిసిపి (సౌత్ ఈస్ట్) తెలిపారు.
ఢిల్లీ ప్రజలు నిర్భయంగా వేడుకలు జరుపుకోవచ్చని, పోలీసులు నిరంతరం పహారా కాస్తున్నారని అధికారులు భరోసా ఇచ్చారు. అనుమానిత వ్యక్తులు లేదా వస్తువులు కనిపిస్తే వెంటనే 112 లేదా 139 నెంబర్లకు సమాచారం అందించాలని కోరారు.
